MUONEKANO wa Majengo ya Mradi wa Hoteli ya SSPD –Buhairan –Planhotel SA, inayojengwa Bwejuu Mkoa wa Kusini Unguja, iliyowekwa Jiwe la Msingi la ujenzi wake na Rais wa Zanzibar na Mwenyekiti wa Baraza la Mapinduzi Mhe.Dk.Hussein Ali Mwinyi leo 6-1-2025, ikiwa ni Shamrashamra za Maadhimisho ya Miaka 61 ya Mapinduzi Matukufu ya Zanzibar.(Picha na Ikulu).
RAIS wa Zanzibar na Mwenyekiti wa Baraza la Mapinduzi Mhe.Dk.Hussein Ali Mwinyi akiondoa pazia kuweka Jiwe la Msingi la Mradi wa Ujenzi wa Hoteli ya SSPD – Buhairan-Plan Hotel SA inayojengwa Bwejuu Mkoa wa Kusini Unguja leo 6-1-2025, ikiwa ni Shamrashamra za Maadhimisho ya Miaka 61 ya Mapinduzi Matukufu ya Zanzibar na (kushoto kwa Rais) Mke wa Rais wa Zanzibar Mama Mariam Mwinyi, Mkuu wa Mkoa wa Kusini Unguja Mhe.Ayuob Mohammed Mahmoud na Katibu wa Baraza la Mapinduzi na Katibu Mkuu Kiongozi Mhandisi Zena Said Ahmed. (Picha na Ikulu).
RAIS wa Zanzibar na Mwenyekiti wa Baraza la Mapinduzi Mhe.Dk.Hussein Ali Mwinyi akiwa na Mkewe Mama Mariam Mwinyi wakipata maelezo ya Mradi wa ujenzi wa Hoteli ya SSPD- Buhairan-Plan Hotel SA, inayojengwa Bwejuu kutoka kwa Meneja Mradi huo Bahaaedin Abdelmonem, wakati wa hafla ya uwekaji wa Jiwe la Msingi la Hoteli hiyo uliofanyika leo 6-1-2025, ikiwa ni Shamrashamra za Maadhimisho ya Miaka 61 ya Mapinduzi Matukufu ya Zanzibar.(Picha na Ikulu)
Na Mwandishi Maalum
Rais wa Zanzibar na Mwenyekiti wa Baraza la Mapinduzi Dk, Hussein Ali Mwinyi ameeleza kuwa kuna Ongezeko kubwa la Wawekezaji katika Sekta ya Utalii hatua inayochangia Ukuaji wa Uchumi na Maendeleo ya nchi.
Amebainisha kuwa Ongezeko hilo la Wawekezaji pia linachangia Ongezeko la Watalii wanaotembelea nchini hali inayoiimarisha sekta ya Utalii.
Rais Dk, Mwinyi ametoa Tamko hilo alipoweka Jiwe la Msingi la Ujenzi wa Hoteli ya SSPD-BUHAIRAN iliyopo Bwejuu Mkoa Kusini Unguja Inayomilikiwa na Wawekezaji kutoka Falme za Kiarabu.
Rais Dk, Mwinyi amefahamisha Kuwa Faida za Utalii ni Kubwa kwa nchi katika nyanja mbalimbali za kiuchumi na kuwahimiza Wananchi kuendelea Kuwaunga Mkono Wawekezaji wanaowekeza maeneo mbalimbali.
Amezitaja Faida hizo kuwa ni pamoja na Fursa za Ajira kwa Vijana zile moja kwa moja na nyengine zisizo za moja kwa moja , Upatikanaji wa soķo kwa bidhaa zinazozalishwa na Wakulima na Wavuvi kwa bidhaa za Baharini na Ongezeko la Pato la Taifa.
Akizungumzia Uwekezaji wa Hotel hiyo aliyoielezea kuwa ya Viwango Rais Dk. Mwinyi ameeleza kufunguliwa kwake kutafungua Milango kwa Zanzibar kupokea Wageni wengi zaidi kutoka Falme za Kiarabu.
Aidha amewapongeza Wananchi wa Bwejuu na Mkoa wa Kusini kwa Kuonesha Utayari wao na Kuwakaribisha Wawekezaji hao.
Wakati huohuo Rais Dk Mwinyi ameridhia Ombi lililowasilishwa na Mkuu wa Mkoa wa Kusini Unguja Ayoub Muhammed Mahmoud kwa niaba ya Wananchi la kutengenezewa Barabara Ya Kilomita Tatu kwa Kiwango cha lami Kutoka Michamvi Mashariki hadi Michamvi Magharibi.
Akizungumza katika hafla hiyo kwa niaba ya Mmiliki na Muekezaji wa Mradi huo Dk, Muhammed Omar ameishukuru Serikali kwa kukubaliwa kuwekeza Mradi huo aliouelezea kuwa Utawanufaisha Wakaazi wa eneo hilo kwa Fursa za ajira 500 pamoja na kuchangia Uchumi wa nchi.
Naye Mkurugenzi Mtendaji wa Mamlaka ya Uwekezaji Zanzibar ( ZIPA) Saleh Saad Muhammed amefahamisha kuwa katika Kipindi cha Miaka minne ya Awamu ya nane ZIPA imesajili zaidi ya Miradi ya Uwekezaji 430 ikiwa na thamani ya takriban Shillingi Bilioni 5.6 itakayotoa fursa za ajira 25,000.
Ufunguzi wa Mradi huo ni miongoni mwa Shamrashamra za Sherehe za Miaka 61 ya Mapinduzi ya Zanziibar.
IDARA YA MAWASILIANO – IKULU ZANZIBAR
